Iyalan wata mata da ta rasu bayan ta haihu a asibitin koyarwa na Aminu Kano (AKTH) sun zargi cibiyar da sakaci da rashin kayan aikin ceton rai da suka hada da injin iskar oxygen.
Wata uwa mai suna Amina Muhammad Aliyu Gumel, an kwantar da ita a ranar Juma’ar da ta gabata a asibiti bayan da ta kai kanta lokacin da ta fara samun matsala.
Halin da take ciki a cewar mahaifiyarta, Bilkisu Mukhtar, ya kara tabarbarewa jim kadan bayan da aka yi mata tiyata (CS), sai dai ana zargin asibitin ta kasa ba ta cikakkiyar kulawa har lafiyar ta tabarbarewar.
Da take zantawa da manema labarai a ranar Litinin, Bilkisu ta bayyana lamarin a matsayin abin tsoro.
Ta ce an jinkirta CS da farko saboda likitoci sun dage cewa dole ne a samu jini idan ana bukatar sa a lokacin aikin ko bayan aikin.
A ƙarshe, an gudanar da aikin, amma an ruwaito cewa yanayin lafiyar Amina ya kasance mai tsanani bayan tiyata.
“Tana fama da numfashi. A bayyane yake cewa tana bukatar taimako na gaggawa, amma likitocin ba su yi gaggawar daukar mataki ba,” in ji mahaifiyar.
A cewar iyalan, an dora Amina a kan iskar oxygen tare da na’urar hannu, daga baya kuma aka hada ta da na’urar da ke dauke da iskar oxygen amma babu wutar lantarki da za ta iya kunna na’urar.
“Muna kallon yadda take ta faman nunfashi, ba ta iya yin komai, sai da muka koma amfani da na’uramai caji saboda zafi da rashin isassun iskar oxygen, babu wani abu da ya yi tasiri,” in ji Bilkisu.
Iyalin sun ce sun roki asibitin da a mayar da Amina zuwa sashin kula da marasa lafiya na gaggawa (ICU), amma an ki amincewa da bukatarsu.
A maimakon haka, an ɗauke ta zuwa ɗakin naƙuda—duk da ta riga ta haihu.
“Ba mu fahimci shawarar ba, me za ta yi a dakin nakuda bayan ta haihu?” mahaifiyarta ta ce. “Ta mutu jim kadan da Kaita wajen.
Saboda haka dangin sun sha alwashin ba za su yi shiru ba, suna masu cewa suna son a bi musu hakkin ‘yar uwar su game da abin da suka bayyana a matsayin gazawar tsarin kiwon lafiya wanda ke jefa rayuka cikin hadari.
Da aka tuntubi babbar jami’ar yada labarai ta AKTH, Hauwa’u Inuwa Dutse, da farko ta shaida wa manema labarai cewa tana bukatar wani lokaci kafin ta gano lamarin, inda daga bisani ‘yar jaridar ta sake kiran ta. Ta ce tuni hukumar ta duba fayil din marigayin, kuma ana ci gaba da gudanar da bincike don tabbatar me ya faru.
Asibitin na gudanar da bincike kan lamarin kuma nan gaba kadan za ta bayyana wa jama’a binciken da aka yi.
Hauwa ta kara da cewa “‘yan uwan marasa lafiya ba su da hurumin bayyana hanyoyin da za a bi a asibiti ko kuma ya ya dace a kula da maras lafiya, amma muna daukar zargin da muhimmanci,” in ji Hauwa. “Na nemi bayani daga ƙungiyar likitocin. Suna nazarin fayil ɗin marasa lafiya kuma za su ba da cikakkun bayanai ga jama’a,” in ji ta.
Lamarin ya haifar da sake yin kiraye-kirayen a inganta kulawar asibitoci, ingantattun tsarin bayar da agajin gaggawa, da isassun kayan aikin likita a cibiyoyin kiwon lafiyar jama’a.
