Majalisar Dattawa ta tabbatar da tsohon Babban Hafsan Tsaro na Najeriya, Janar Christopher Musa (mai ritaya), a matsayin sabon Ministan Tsaro na ƙasar.
An tabbatar da shi ne ranar Laraba ta hanyar kuri’ar murya, bayan zaman tantancewa da ’yan majalisar suka gudanar a zauren su na Kwamitin da ya haɗa kowa da kowa, inda suka tambaye shi jerin tambayoyi masu yawa kan aikin tsaro da makomar rundunonin soji.
Janar Musa, wanda ya yi murabus daga aikin soja kusan kwanaki 40 da suka gabata, shi ne Shugaba Bola Tinubu ya sake gabatar wa majalisar a matsayin zabinsa na Ministan Tsaro a ranar Talata, tare da neman gaggawar tabbatar da shi.
A yayin zaman tantancewar, ’yan majalisar sun tattauna da shi kan batutuwan da suka shafi tsaro, matsalolin hare-hare da suke fuskantar ƙasar, da sabbin dabarun da ake sa ran zai kawo domin ƙarfafa tsaron ƙasa.
Majalisar ta amince da nadin nasa bayan ba a sami wata adawa kai tsaye ba a zauren majalisar.
